Den nye havenergilova vart den første fra olje- og energidepartementet på nynorsk.

– Det er flott og på høg tid nynorsken blir representert i lovverket departementet forvaltar, seier olje- og energiminister Terje Riis-Johansen i pressemeldinga, som også er skriven på nynorsk.

NYNORSK: – Eg syns det er veldig bra og heilt på sin plass, seier Håvard B. Øvregård i Noregs Mållag om at Oljedepartementet nyttar nynorsk.

– På sin plass

– Eg syns det er veldig bra og heilt på sin plass. Eg vil gi stort skryt, men det er heilt på sin plass. Dette lover godt for oppfølginga av stortingsmelding 35, som slår fast at ein alltid skal tenkje på om ein kan nytte nynorsk, seier Håvard B. Øvregård i Noregs Mållag til Teknisk Ukeblad.

– Dette var hyggeleg. Lova er eit nybrottsarbeid på energiproduksjon, så det passa godt med nybrottsarbeid på språket også, seier Gunnar Kvassheim (V), leiar i Stortingets energi- og miljøkomite.

I ei pressemelding frå mållaget utdjupar statsråden kvifor han nyttar nynorsk:

– Det er vel slik at realiteten er at det er helst små dokument som er på nynorsk, medan dei store har vore på bokmål. Difor er det bra at eit så omfangsrikt og viktig lovframlegg kjem på nynorsk, seier Riis-Johansen.

– Ein av verstingane

Mållaget meiner Olje- og energidepartementet har vore eitt av dei dårlegaste departementa på å nytte nynorsk i sine dokument.

– Vi har ikkje noko verstingliste på departementa. Men Olje- og energidepartementet har vore mellom dei som har vore mindre gode. Det seier jo litt at dette er den første lova deira på nynorsk. Også Finansdepartementet og Helsedepartementet har ein jobb å gjere, seier Øvregård.

– Syner språkleg medvit

Mållaget er nøgd med at departementet sjølv har teke tak i saka.

– Her har ein eit departement som har teke tak i dette og syner medvit om språk og nynorsk. Eit føredøme for andre, som kanskje treng noko meir hjelp for å bli mint på dette.

– No kan ein seie at nynorsk er i vinden – i alle fall havvinden?

– Det er ikkje berre i havvinden at nynorsken er. Vi ser det meir i næringslivet og reklamebransjen, og no også i departementa, seier Øvregård.

– Er departementa flinke nok til å nytte nynorsk?

– Det er særs variabelt. Utfordringa er at politikarane har sett klare mål i stortingsmeldinga, men det er ein jobb å gjere før måla vert gjennomført frå statlege organ sitt hald. Dette er ei hovudutfordringa i mållaget sitt arbeid, seier Øvregård.